دمعة الشوق الشاعر مصطفى بطران

دمعــــة الشــــوق كــــبي
حكم حــــبي ..أرعى نجم الليل

نسمة السحار.... ليلى طال هبي
أنا مساهر...ونومـــــي متخبى

انتحـل جســــمي والمحـال طبي
مصدره الزهرة الفى نواحي سهيل

انشغال فكــــرى وانفقــاد لبى
وشحــــوب لونى.... كلو من حبي

انســــلب بالــــى وانتزع قلبي
أما امــــالى طوحــــت بالميل

صدري مزمــاري والدمـــوع شربي
أنطـــــرب كل ما ذكره يخطر بى

ماله جافى نفور ما بدور قـــربى
وأنا مالي دوام لي خياله أمــيل

حين قوامــــه يميل للعقول يسبى
وازدهار محيه للبدور يخــــــبى

في جبينه تشوف حكمة الـــــــرب
زى ســـواد حظي جوز دواعجه كحيل

يا بديــع الزى وأزهــــر اللون
يا خفيف الروح يا ســــما الصون

خلقــــك مولاك زينة للكـــــــون
وحبب الأرواح في هواك ياجمـــــيل

عهدي بيك يا جميل دأبك الحـــلم
وارى هجـــــرك لي نير الظــــلم

وأنت عــــارف نوع حبي ليك سلمى
شوقي مهما ازداد برضي شايفه قليل